Drejtoria e Policisë Financiare ka ndërmarrë një aksion të gjerë në komunat e Likovës, Kumanovës dhe Zhelinës, duke kontrolluar disa lokacione të dyshuara për veprimtari kriminale. Sipas të dhënave fillestare dyshohet për shoqatë kriminale, evazion fiskal, mashtrim tatimor dhe pastrim parash.
Shtatë persona janë arrestuar në aksionin e Policisë Financiare dhe Zyrës së Prokurorisë për krim të organizuar dhe korrupsion. Ata dyshohen për shoqatë kriminale, mashtrim dhe pastrim parash. Hetimi, i cili është kryer në tetë lokacione në Kumanovë, Zhelinë, Likovë dhe Nikushtak, përfshin 10 kompani dhe 13 persona. Dyshohen për shitje të naftës me para në dorë dhe për raportimin e të ardhurave nga shitjet si transaksione ditore, përmes faturave fiktive dhe pastaj kërkimin e rimbursimit të tvsh-së.
“Me urdhër të një prokurori publik nga zyra e Prokurorisë themelore publike për ndjekjen e krimit të organizuar dhe korrupsionit, në aksionin dhe me ndihmën e njësisë speciale antiterrorist “Tigrat”, shtatë persona u privuan nga liria dhe dolën para një gjykatësi në një procedurë paraprake në gjykatën themelore penale dhe një person nuk është i disponueshëm për autoritetet e ndjekjes.”, thuhet në njoftimin e Policisë Financiare.
Ata shtojnë se ky hetim ka zgjatur për dy vite. Bëhet fjalë për një krim me vlerë rreth 7 milionë euro. Nga Drejtoria e Policisë Financiare thonë se mbeten të përkushtuar në zbulimin dhe ndjekjen penale të krimit financiar dhe mbrojtjen e buxhetit të shtetit.
