Emërimi i Bujar Osmanit si koordinator për Degën e BDI-së në Çair sipas Izet Mexhitit është revanshizëm politik nga ana e Ali Ahmeti ndaj atyre që kanë mendim ndryshe në BDI. Mexhiti thotë posti i koordinatorit politik në një degë nuk ekziston si pozitë në organet e BDI-së. Sipas tij emërimet e këtij lloji kanë shkaktuar pasoja të rënda më herët.
“Është tragjike mënyra e revanshizmit, dmth, e diferencimit politik që po ndodh brenda BDI, që edhe njëherë vërteton që nuk është tendencë por tjetërsim i BDI-së. Këtë të fundit që e kuptova nga mediat, koordinator për çështje politike në Çair është edhe çështje qesharake, pasi një pozitë e këtillë nuk ekziston në organogramën e BDI-së, pra është nj pozitë e sajuar dhe historikisht nuk i ka sjellë fryt kjo BDI-së, bilës në disa raste ka pasur edhe pasoje të rënda kur nuk është respektuar statuti, nuk janë respektuar procedurat, ku nuk është respektuar vullneti i qytetarëve dhe votuesve, e sidomos ku tubimi i fundit ka qenë masiv, euforik”, tha Izet Mexhiti, nënkryetar BDI.
Ndërkohë ka vazhduar “pastrimi” i institucioneve nga mbështetësit e Grupit të Zjarrit. Adnan Ejupi i ishte i shkarkuari i radhës nga pozita e sekretarit shtetëror në Ministrinë e Sistemit Politik, e cila drejtohet nga Artan Grubi. Pas shkarkimit Ejup tha se ka hasur në obstruksione nga vetë ministri Grubi. Ndërsa me ironi falënderoi kryetarin e BDI-së Ali Ahmeti për shkarkimin.
“Është e vërtetë që qëndrimi im ka korresponduar me atë të Izet Mexhitit, Blerim Bexhetit dhe tjerëve, dhe këtë nuk e kam fshehur. Është e vërtetë që edhe unë kam pasur mendim ndryshe, dhe si pasojë shkarkohem dhe zëvendësohem nga një kuadër i Aleancës për shqiptarët. Për fund, dua të them vetëm faleminderit kryetar për shkarkimin, faleminderit që një militant të partisë tonë e zëvendësuat me një ithtarë të Kasaphanës së vitit 2008”, u shpreh Adnan Ejupi, BDI.
Për shkarkimet dhe emërimet e reja si brenda BDI-së por edhe në ekzekutiv, Alsat kërkoi qëndrim edhe nga i ngarkuari si koordinator në degën e BDI-së në Çair, Bujar Osmani. Por Osmani ishte i pakapshëm./Alsat.mk
