Shefi i shtabit të VLEN, Adnan Azizi gjatë hapjes së Shtabit zgjedhor në Kumanovë ka thënë se në Njësinë zgjedhore 6, VLEN do t’i fitojë të gjitha komunat.
”Ne kemi bërë edhe matje, sondazhe të brendshme, ta dini se BDI në zonën 6 nuk do të ketë asnjë komunë. Sondazhet që kemi bërë për matje të brendshme janë se Bilalli në Tetovë fiton 3 me 1 dhe në çdo komunë tjetër, në Tearcë, Zhelinë, Bogovinë, çdo komunë tjetër, fitojmë 2 me 1 dhe do e shihni më 19 tetor se fitorja e VLEN do të jetë nga Kumanova deri në Strugë”, ka thënë Azizi.
Ai shton se të vetmin avantazh BDI e ka në Pllasnicë ku VLEN nuk ka kandidat.
Ai ka drejtuar edhe akuza ndaj liderit të BDI-së, Ali Ahmeti, i cili siç thotë, “çdoherë i ka marrë mbi vete meritat e tjerëve”.
“Edhe kur është caktuar Ali Ahmeti për komandant ta dini se 7 javë ka ndejt në infuzion, është frikacak, manipulant, hipokrit, gjithmonë i ka marrë mbi vetë meritat e tjerëve”, thekson Azizi.
Zëvendëskryeministri për qeverisje të mirë, Arben Fetai ka demaskuar BDI-në, kur kjo e fundit në vazhdimësi po pohon se po minohet Marrëveshja e Ohrit dhe se po deshqiptarizohen institucionet.
Sipas Fetait të gjitha këto janë gënjeshtra të BDI-së dhe se VLEN është garancia se kjo nuk do të ndodhë.
“Ata vazhdimisht manipulojnë, gënjejnë opinionin duke thënë se po minohet Marrëveshja e Ohrit, po deshqiptarizohen institucionet, po preket gjuha shqipe, në realitet po ndodhë krejtësisht e kundërta”, tha Fetai.
Kur flasim për deshqiptarizimin, shton ai, hisen tonë e kemi, është hise e fuqishme dhe më e mirë e asaj që e ka pasur BDI, me përjashtim të periudhës me Kovaçevskin.
“Është po ajo BDI ka kërkuar në VMRO dhe ka thënë se vijmë në qeveri minus kryetarin e Parlamentit, minus ministri vetëm të futemi aty”, u shpreh Fetai.
Sipas numrave për 15 muaj, shton ai janë realizuar 2.300 punësime të shqiptarëve në sektorin publik, më shumë se sa BDI që ka mundur të punësojë për një mandat.
Edhe te avancimet është njëjtë sipas tij, ata që kanë ngecur për dekada në pozitën e bashkëpunëtorit të ri, kjo kategori nuk ekziston më.
“E kemi hequr me ligj dhe jemi kujdesur që të avancojmë qindra shqiptarë në çdo institucion në sektorin publik”, nënvizon Fetai.
Zeqirija Ibraimi, një nga liderët e koalicionit VLEN, tha se VLEN nuk është vetëm një koalicion politik, por “një zë, një numër, një ide”.
“VLEN një zë 7!”, tha ai para të pranishmëve, ku u bë hapja e Shtabit zgjedhor dhe promovimi i listës së kandidatëve për këshilltarë komunalë si dhe i kandidatit për kryetar komune nga radhët e VLEN-it, Arben Etemi.
“Sonte në Kumanovë po flasim për kapitullin e ri të VLEN, një rrugëtim që është nisur para katër viteve, në pushtetin lokal me projekte të prekshme që ndryshuan komplet pamjen e vendbanimeve shqiptare! Në Kumanovë nuk po nisim, por po e vazhdojmë rrugën e ndryshimit!”, nënvizoi mes tjerash, Ibrahimi.
