Kryetari i LDK-së, Luimir Abdixhiku, refuzon ftesën e kreut të Vetëvendosjes, Albin Kurti, për koalicion mes Vetëvendosjes dhe LDK-së. Ai e vlerëson të pamundur bashkëpunimin me Vetëvendosjen dhe duke pasur parasysh krizën e thellë politike në të cilën ndodhet Kosova, ftesës së Kurtit për koalicion, Abdixhiku i përgjigjet me propozimin për krijimin e Qeverisë së tranzicionit.
“LDK-ja dhe unë si kryetar i saj propozojmë nisjen e një procesi të ri politik. Kjo zgjedhje kërkon edhe përgjegjshmëri edhe vetëdije të lartë politike. LDK-ja propozon nisjen e këtij procesi fillimisht konsultime me të gjitha partitë politike shqiptare, me qëllim të zgjedhjes së Qeverisë nacionale të tranzicionit. LDK-ja kërkon unitet gjithëshqiptar në këtë periudhë dhe formimin e Qeverisë nacionale të tranzicionit me afat të caktuar deri në zgjedhjen e presidentit të ri, program agjendë shtetërore të politikës së brendshme dhe të jashtme.”, – deklaroi kryetari i LDK-së, Lumir Abdixhiku.
Derisa refuzoi ftesën e kryeministrit në detyrë Albin Kurti për takim, Abdixhiku tha se për krijimin e Qeverisë së tranzicionit është i gatshëm të takohet me të gjithë liderët e partive shqiptare.
Sipas Abdixhikut, një Qeveri e tillë duhet të udhëhiqet nga një kryeministër i pranueshëm për të gjithë. Por, paraprakisht kreu i Vetëvendosjes, Albin Kurti, ka deklaruar se ai do të vazhdojë të jetë kryeministër i Kosovës. (Gyltene Sinani, TVM2)
