Gjykata Civile përgënjeshtron Gjykatën Penale lidhur me një vendim të marrë për kujdestarinë e fëmijëve të të dyshuarit Asmir Jahoski, në rastin për furnizime me mazut të dyshimtë, shkruan TV21. Gjykata Themelore Shkupi-2 ekskluzivisht për TV21 thotë se nuk ka pasur kërkesë që Jahoski të kujdeset për 4 fëmijët e tij, tre prej të cilëve ishin të mitur. Sipas tyre, në sistemin AKMIS nuk është dhënë një vendim i tillë për Jahoskin.
Ndryshe, sipas njoftimit të Prokurorisë, në vendimin e gjykatës, kjo ishte njëra nga arsyet për zëvendësim të masës së paraburgimit me masën e arrestit shtëpiak dhe masë të kujdesit.
“Gjykata Themelore Shkupi 2, njofton se personi Asmir Jahoski, i lindur me 19.10.1984 me adresë në fshatin Pllasnicë, nuk ka parashtruar kërkesë në Gjykatën Civile për kujdestarinë e fëmijëve të tij. Sipas informatave të ofruara në përputhje me sistemin operativ AKMIS që përdoret në punën e gjykatave në Republikën e Maqedonisë së Veriut, për personin Asmir Jahoski është detektuar vetëm një lëndë ‘P1 nr.3081/12’ për një borxh që një person T.C. i ka atij, lëndë e cila ka pasur aktvendim më 03.04.2013”, thonë nga Gjykata Themelore Civile Shkupi 2.
