Pas shumë viteve mungesë, volejbolli shqiptar në Shkup ka gjetur shtëpinë e tij – Klubin “Shkupi Volley”. Sot, kandidati për kryetar të Komunës së Çairit nga koalicioni VLEN, Izet Mexhiti, zhvilloi një vizitë në këtë vatër sporti, e cila është bërë sinonim i përkushtimit dhe ringjalljes së traditës sportive.
I themeluar nga z. Agim Latifi, i cili që nga viti 2016 nisi punën me grupmoshat e reja, klubi u organizua zyrtarisht në vitin 2019. Që prej asaj kohe, “Shkupi Volley” ka rikthyer energjinë e volejbollit në mesin e të rinjve shqiptarë, duke u bërë simbol i një tradite të rilindur.
Gjatë vizitës, Mexhiti u shpreh i impresionuar nga puna e palodhshme e kryetarit dhe trajnerit Agim Latifi, si dhe e trajnerëve të përkushtuar Nazlije Latifi Miftari, Alba Misini dhe Ezana Hoti, të cilët po krijojnë një rrugë të re për gjeneratat e reja, duke i afruar me sportin, disiplinën dhe frymën ekipore.
> “Rezultatet e këtij klubi flasin vetë. Është krenari për të gjithë komunitetin që ‘Shkupi Volley’ do të përfaqësojë volejbollin shqiptar në Ligën e Dytë Profesionale të Volejbollit të Republikës së Maqedonisë së Veriut. Ky është një shembull se si vizioni, përkushtimi dhe dashuria për sportin kthehen në histori suksesi,” deklaroi Mexhiti.
Ai falënderoi drejtuesit e klubit për mikpritjen dhe uroi që puna e tyre të vazhdojë të frymëzojë gjeneratat e ardhshme, duke theksuar se mbështetja për sportin dhe të rinjtë do të jetë një ndër prioritetet kryesore të tij në udhëheqjen e Komunës së Çairit.
