Të paktën 70 trupa janë nxjerrë nga deti dhe 1200 njerëz janë shpëtuar pasi dhjetëra varka të mbushura u përpoqën të kalonin Mesdheun.
Shumë të tjerë mbeten të zhdukur pas një morie përpjekjesh për të arritur në Evropë nga Tunizia, ku zyrtarët thonë se morgut po i mbaron hapësira pasi numri i të vdekurve nga kalimet vazhdon të rritet, shkruan Skynews.
Rreth 1200 njerëz përfunduan në një ishull të vogël italian pasi ekipet e rojes bregdetare iu përgjigjën 35 anijeve që ishin nisur nga Afrika e Veriut, të mbushura me njerëz që rrezikonin gjithçka për të arritur në Evropë.
Tre prej anijeve u futën në vështirësi, me 23 persona të zhdukur dhe rreth 20 varka të tjera mbetën në det mbrëmjen e së hënës, thanë ekipet e shpëtimit italian.
Në qytetin bregdetar tunizian Sfax, një zyrtar gjyqësor paraqiti një pamje të zymtë të situatës në spitalet lokale.
“Morget në spitalet Sfax po vuajnë nga presioni i madh për shkak të numrit të madh të kufomave të emigrantëve. Është një kërcënim për shëndetin publik,” tha Faouzi Masmoudi.
“Trupat e të paktën 70 personave nga Afrika që vdiqën duke tentuar kalimin e rrezikshëm janë gjetur që nga e premtja”, tha ai.
Sipas shifrave të Ministrisë së Brendshme italiane, deri të hënën në mëngjes më shumë se 36 mijë e 600 njerëz kishin mbërritur në Itali që nga fillimi i vitit – më shumë se katërfishi i numrit për të njëjtën periudhë në secilin nga dy vitet e mëparshme.
Italia refuzon shumicën e ofertave të tyre për azil, sepse thotë se ata po ikin nga varfëria, jo nga lufta apo persekutimi.
