Shumë mësues të arsimit fillor dhe parashkollor nga Komuna e Çairit u nderuan me mirënjohje në nder të 7 Marsit. Kryetari i Komunës së Çairit, Visar Ganiu tha se në këtë ditë nderohen jo vetëm ata që janë aktivë në sistemin arsimor, por edhe mësuesit që pas dekadash shërbimi dalin në pension, duke lënë një trashëgimi të çmuar për brezat e ardhshëm. Në ditën e mësuesit, Ganiu shpalli edhe 51 vendime pune, 43 për punonjësit në arsimin fillor dhe 8 vendime për arsimin parashkollor.
“Arsimi nuk është vetëm një proces akademik, por një mjet i fuqishëm për ndërtimin e një shoqërie të ndriçuar, të barabartë dhe të përparuar. Ai është baza mbi të cilën ndërtojmë vlera si toleranca, respekti, mendimi kritik dhe inovacioni. Pikërisht për këtë arsye, sot, më shumë se kurrë, është e rëndësishme që t’i mbështesim mësuesit tanë dhe të krijojmë kushte më të mira për zhvillimin e arsimit”, deklaroi Visar Ganiu, kryetar I Komunës së Çairit. /Alsat.mk
