Gjykata Penale sot ka refuzuar kërkesën për amnisti të organizatorëve të dhunës në Kuvend më 27 prill, Trajko Veljanovski, Mile Janakievski, Spiro Ristovski dhe Vlladimir Atanasovski. I pari i trupit Gjykues në këtë lëndë, gjykatësi Ilija Trpkov potencoi se pas kërkesës së të akuzuarve për falje, duke u bazuar në ligjin e 2018-tës për Amnisti, ka marrë mendim edhe nga prokurori publik me çka edhe është vendosur që këto kërkesa janë të pabaza.
“Refuzohet si e pabazë kërkesa për amnisti, sepse nuk janë përmbushur kushtet e nenit 1, paragrafi 2, alineja 1 dhe 2 nga Ligji për Amnisti”, deklaroi Ilija Trpkov, gjykatës.
Meqë këta të akuzuar kanë të drejtë të ankohen për këtë vendim në Apel, gjykimi u shty për më 6 korrik. Për avokatin e mbrojtjes, Elenko Millanov gjykata me këto veprime diskriminon të akuzuarit duke mos i trajtuar njëjtë me deputetët tjerë, të cilëve më herët iu pranua kërkesa për Amnisti.
Advertisements
“Kërkesën e bazuam te Ligji për Amnisti, mirëpo dukshëm po vazhdon trajtimi i pabarabartë të qytetarëve të Maqedonisë. Ligji për Amnisti është zbatuar për pesë deputetë, mirëpo sot për deputetin Trajko Veljanovski i njëjti nuk vlen dhe ai dëshiron të trajtohet si person zyrtar. Mile Jakanievski nuk ka asnjë detyrë dhe nuk trajtohet ashtu si nga prokuroria u trajtua në sjelljen e konstatimeve pas sjelljes së këtij ligji për Amnisti. I akuzuari Spiro Ristovski, aspak nuk u gjend në atë hapësirë, aspak nuk ka asnjë detyrë zyrtare si zëvendës ministër në aspekt të sigurisë apo atë që ndodhë në seancat e Kuvendit, mirëpo as për atë në mënyrë selektive prokuroria nuk jep mendim pozitiv”, u shpreh Elenko Millanov, avokat.
Kryetari i mëhershëm i Kuvendit, Trajko Veljanovski, ish-ministrat Mile Janakievski dhe Spiro Ristovski si dhe ish shefi i Policisë Sekrete, Vlladimir Atanasovski akuzohen për kryerje të veprës penale cenim terrorist të rendit kushtetues dhe sigurisë.
Ata dy vite më herët nga Gjykata Penale u dënuan me gjithsej 25 vjet burg por në Prill të këtij viti nga burgu i ‘shpëtoi’ Gjykata e Apelit, duke ua shfuqizuar dënimet me burg nën arsyetimin se gjykata e shkallës së parë kishte kryer shkelje thelbësore gjatë procedurës gjyqësore. /Alsat
