Asambleja e Përgjithshme e OKB-së votoi të premten për të mbështetur një rezolutë që synon t’i japë frymë të re zgjidhjes me dy shtete midis Izraelit dhe Palestinës, pa përfshirjen e Hamasit.
Teksti u miratua me 142 vota pro, 10 kundër, përfshirë Izraelin dhe aleatin e tij kryesor, Shtetet e Bashkuara dhe 12 abstenime. Ai dënon qartë Hamasin dhe kërkon dorëzimin e armëve të tij.
Shqipëria dhe Maqedonia e Veriut kanë mbajtur një pozicion neutral gjatë këtij votimi duke abstenuar.
Edhe pse Izraeli ka kritikuar organet e OKB-së për gati dy vjet për mungesën e dënimit të sulmit të Hamasit më 7 tetor 2023, deklarata e paraqitur nga Franca dhe Arabia Saudite nuk lë asnjë paqartësi.
E quajtur zyrtarisht “Deklarata e Nju Jorkut mbi Zgjidhjen Paqësore të Çështjes së Palestinës dhe Zbatimin e Zgjidhjes me Dy Shtete”, teksti thotë se “Hamas duhet të lirojë të gjithë pengjet” dhe se Asambleja e Përgjithshme e OKB-së dënon “sulmet e kryera nga Hamasi ndaj civilëve më 7 tetor.”
Ajo gjithashtu bën thirrje për “veprim kolektiv për t’i dhënë fund luftës në Gaza, për të arritur një zgjidhje të drejtë, paqësore dhe të qëndrueshme të konfliktit izraelito-palestinez, bazuar në zbatimin efektiv të zgjidhjes me dy shtete.”
Deklarata, e cila tashmë ishte mbështetur nga Liga Arabe dhe u bashkë-nënshkrua në korrik nga 17 shtete anëtare të OKB-së, përfshirë disa vende arabe, synon gjithashtu të përjashtojë plotësisht Hamasin nga udhëheqja në Gaza.
Nënkryetari palestinez Hussein al-Sheikh e mirëpriti vendimin, duke thënë se rezoluta “shpreh vullnetin ndërkombëtar për të mbështetur të drejtat e popullit tonë dhe përbën një hap të rëndësishëm drejt përfundimit të okupimit dhe arritjes së shtetit tonë të pavarur.”
Ndërkohë, zëdhënësi i ministrisë së jashtme izraelite, Oren Marmorstein, e dënoi votimin, duke shkruar në X se Izraeli “e hedh poshtë kategorikisht” deklaratën, duke e quajtur atë dëshmi se Asambleja e Përgjithshme ishte shndërruar në “një cirk politik i shkëputur nga realiteti.”
Votimi i paraprin një samiti të ardhshëm të OKB-së të bashkëkryesuar nga Rijadi dhe Parisi më 22 shtator në Nju Jork, ku presidenti francez Emmanuel Macron ka premtuar të njohë zyrtarisht shtetin palestinez.
Përveç Macron-it, disa liderë të tjerë kanë shpallur synimin e tyre për të njohur zyrtarisht shtetin palestinez gjatë samitit të OKB-së.
Këto gjeste shihen si një mënyrë për të rritur presionin mbi Izraelin që t’i japë fund luftës në Gaza, e cila u shkaktua nga sulmet e Hamasit më 7 tetor 2023.
Rreth tre të katërtat e 193 shteteve anëtare të OKB-së e njohin shtetin palestinez, të shpallur në vitin 1988 nga udhëheqja palestineze në mërgim. Megjithatë, dy vjet luftë kanë shkatërruar Rripin e Gazës, përveç zgjerimit të vendbanimeve izraelite në Bregun Perëndimor dhe dëshirës së shprehur nga zyrtarët izraelitë për të aneksuar territorin.
Kjo bën që shumë të frikësohen se ekzistenca e një shteti palestinez të pavarur së shpejti do të bëhet e pamundur. “Ne do ta përmbushim premtimin tonë që nuk do të ketë shtet palestinez,” u zotua kryeministri izraelit Benjamin Netanyahu të enjten. Ndërkohë, presidenti palestinez Mahmoud Abbas mund të pengohet të vizitojë Nju Jorkun për samitin e OKB-së pasi autoritetet amerikane thanë se do t’i refuzojnë një vizë.
