11-vjeçari në Suedi mbledh 230 mijë dollarë duke shitur spila në formë luleje
Murhaf Hamid kishte shpresuar se mund të fitonte mjaftueshëm para për të blerë një picë me miqtë kur filloi të shiste spila në formë luleje “majblommor” në Suedinë jugore.
Fëmijët e moshës 9 deri në 12 vjeç shesin spilat si pjesë e një fushate vjetore nga Majblomman, shoqata bamirëse më e vjetër në Suedi, për të luftuar varfërinë e fëmijëve në vend. Fëmijëve u lejohet të mbajnë 10 për qind të parave që mbledhin si dhe çdo bakshish.
Murhaf, 11 vjeç, nuk e priste kurrë se ai do të thyente rekordin e mbledhjes së fondeve të bamirësisë dhe do të bëhej një sensacion viral gjatë rrugës.
Fillimet për Murhafin duket se ishin jo fort pozitive. Një mikeshë e familjes, Leila Orahman, pa se refuzimet po e mërzitnin Murhafin dhe vendosi të shkruante një postim në rrjetet sociale për të.
Ai shpejt u bë viral, pasi mori nga të gjithë qytetarët në vend më shumë se 3.2 milionë krona (223,200 dollarë) që u derdhën në faqen e tij për mbledhjen e fondeve dixhitale, si dhe 112,000 krona (10,830 dollarë) bakshish.
Åsa Henell, sekretare e përgjithshme e bamirësisë, tha se shitjet ishin “krejtësisht të pabesueshme” dhe ata “nuk kishin parë kurrë diçka të tillë”. Ajo tha se fëmijët zakonisht mbledhin rreth 100 dollarë.
Murhaf, i cili ka lindur në Suedi, ka statusin e azilkërkuesit dhe nuk ka leje qëndrimi. Pas ngjarjes së ndodhur, ai është ftuar në Parlamentin Suedez dhe në Bashkinë në Malmö, qyteti i tretë më i madh i Suedisë.
Murhaf tha për transmetuesin publik të Suedisë, se fakti që ka mundur të shesë kaq shumë kunja lulesh ka “rritur besimin tim në veten time, se mund të përballoj më shumë gjëra në jetë”.
